Lot laba

Sa konm in douser konm in kado
Konm in rézonans la vi
Konm in rikosé konm in léko
In gayar pou sem zordi

Sa konm in relé pou done kouraz
Pou di intel li’a pa tousel
Sa konm in lidé konm in mésaz
Pou fane an zoli nouvel

Sa konm la fé pou li ya fé pou lot laba
É konmsa lot la arfé pou lot laba
Lot la arfé pou lot
Lot ankor pou lot
Sa ziska pou lot laba

Sa konm in lélan pou done lanvi
Ki rebonm in pe partou
Pou amenn in pe la oter filozofi
Pou lo ker in bonbon dou

Sa i fé pa pou la glwar
Pou fé war kisa lé méyer
Ni in di ni in devwar
Zis pou lo plézir done in grin boner

Sa konm la fé pou li ya fé pou lot laba…

Éséyé in kou t’a war
Lé mazik é pa konpliké
In sinp zes ou i pe krwar
I pe anbom tout in zourné
Anbéli nout domounité

Sa konm la fé pou li  li arfé pou lot laba
É konmsa lot va fé pou lot laba
Lot va arfé pou lot
Lot ankor pou lot
Sa ziska pou lot laba
É kan na pi n’ankor

Commentaires

commentaires