Iz ali

Get ali li tyinbo pi dobout
La fine pli jenou
Taler i tard pa
Li sar fini katpaté

Dann son tet li la fini perd tout
Mé ou wa sa lo dout
La po rony ali
Fé son lespri kariaté

Wi sa la po iz ali
Lo tan po kour pli vitman son koté
Dousman dousman mé sirman oté
Vréman é jiskatan li fine oubliyé
Oubliyé kwék li vo é sirtou ki li lé

Nadfwa la vi là kom in léprev
Swa ou i rev out vi
Swa ou i viv out rev
Sa ou tousel i shwazi

Pi ou koné la vi là fo li anshev
Swa dousman ou i mor
Swa dousman ou i krev
E kan fine alé i arvyin pi

Wa di kozman là lé in pe for
Shakinn na son shans son prop malere sor
Pi nadfwa lé vré la pa out fot
La pa pou ou lé pou innot
Mé ou f’ra pa shanj amwin lidé
Ansanm lo ker la volonté
Ou va niabou shas lo dout sa pwazon
Get sa la po kas ti bout par ti bout nout lorizon

Get ali sa la po iz ali…

Commentaires

commentaires