Kafouyaz

Agard aou byin mem ki ou lé
Fié pa la kouler out po
Aou ou i ve pran lo tan armonté
Mé lé dir fé bouj lo bato
Oblijé kal dann bor la mer
Sinonsa désot sel manier
Ala kafouyaz aou osi lé d’dan

Aou kaf ou (kafouyé ou)
Zazakel ou (kafouyé ou)
Yanbane ou (kafouyé ou)
I wa la-mem aou in bann kaf ou
Kom amwin mem aou in bann kaf

Agard aou byin ousa ou i lé
Ojordi Lé tan pou i fé in kont
La plas ou na dann nout sosiété
Lé plis anler oubyin-sa dann fon

Agard aou byin out priyé
La santé ou i rod pa plis
Somanké dann out bann sagayé
Na inn i vé rann aou servis
Mé ou va di tousala i fé per
Tousala-la zistwar manter
Tousala i rant pa dann légliz
Tousala lété jis in mové rev
In lidé aou-la aster
Dann in gran kafouyaz lespri
Dann in gran kafouyaz la vi

Aou kaf ou (kafouyé ou)…

Kaf
Pou tout bann i ve vni d’a limier
Pou tout bann i ve pa ni voler
Pou tout bann kom Albius i ve lev la tet
Pou tout bann i ve onor zot zanset
Pou tout bann i ve ékri nout zistwar
Pou tout bann i ve port nou lespwar
Pou tout bann i ve nou d’anou la min
Pou tout bann i ve nou rouver nout shomin
Pou tout bann i ve war andeor
Pou i tenir son galé pli for
Pou tout bann i ve pran son lavnir
I ve sort dann kafouyaz son kiltir
Lé fier son kozé, lé fier sak li lé
Kréol Rénioné

Kaf ou (kafouyé ou)
Maoulé ou (kafouyé ou)
Malbar ou (kafouyé ou)
I wa la-mem aou in bann kaf ou
Kom amwin mem aou in bann kaf

Commentaires

commentaires