Zwazo la kol

Wo Bondie
Afer ou la poz amwin là siouplé
Ster m’ lé pri dan la kol
Wo Bondie
Mwin zwazo i yem pa anplinyé
Mé là i fo m’ jwé mon rol

Mwin anvi jiré ( larg in foutan )
Mwin anvi béké ( pou fé lo méshan )
Olié sa mi fé mon lintélijan
Komsi ryin lété
Mi fiout an longer d’tan

Wo Bondie
Mwin la fini kom anpayé
Dann in byin joli kaj lé kom la jol
M’a fine depi telman lontan anfermé
Vitman m’ gainy in zel deor lé mol
Dir kit rouver gran lo zie
Aforstan na malol
I abitié ek flou

Mwin i anvi jiré ( larg in foutan )
Mwin I anvi boujé ( lwin fout lo kan )
Olié sa mi fé mon lintérésan
Komsi ryin lété
Mi fiout an longer d’tan

Lé vré nadfwa mi rev
Mon zel dan lo van
Mi vol mi vol mi viv
Mé tro vitman
Mi tonm dann tourman

Ousa m’a alé
Kisa famiy
Kosa manjé
Ki koté dormi
Ryink isi anndan
M’ konpran la vi
Kisa mi lé
Kouk mwin sar vni
Ret si la pay
Mwin la jamé koni
Alor mi di afer shapé
Si pou isi là mem artourné

Wo Bondie
Lé sir ma pa in gran mesie
Mé na in nafer mi trouv in pe drol
Lo jour la vol mon liberté
La d’amwin la parol
Alor Bondie
Akout byin dernié volonté
In kondané d’ zwazo la kol

Commentaires

commentaires