Mesie le kloun

Néna lontan wi lontan m’ té ankor tann
Momon la amène amwin sou in shapito
Mwin té kontan wi kontan navé in bann Ringland
Té pou jwé là sanm tout sort zanimo
Mon zie té gran wi té gran rouver parey té flanm
Té premié fwa m’ té wa d’van mwin an vré
Mwin té san wi té san tout anndan mwin i té tranm
Là dann in roulman batri li la ‘rivé
Wo mesie le kloun
Wo ou la gard amwin ti zangoun
Wo mesie le kloun
Té sa la parey in moun

Té komik wi komik sanm son gro né rouj
Ek son gran soulié li té gainy marsh si d’lo
Mwin té ri wi té ri sanm koman li té bouj
Si son touf sheve inn ti gigine shapo
Pi osi pi osi navé son pantalon
Sa té gran ‘rezman té tyinbo in bertel
Té joli wi joli son kravat papiyon
Son figur té blan kouler niaj dann siel
Wo mesie le kloun
Wo ou la gard amwin ti zangoun
Wo mesie le kloun
Té ou la parey in moun

Li tonm li tonm li tonm li déboul
Li kour li kour li kour si la foul
Oté là tout demoun i kakay
I rod pi ki lé gran lé marmay
Li sot li sot li sot li eskiv
Li tourn li tourn li tourn li dériv
Li pran lélan pou fout in koutpié
Dann in balon oté oté
Mwin té pa lwin d’van li dan mon bra la volé

Ojordi wi jordi kan la vi la pa tann
Mi arwa tousala komsi lété yer
Mwin la vu wi la vi kan balon mwin la rann
Mem tout le bastring navé in moun dérier
Mem tout le bastring navé in moun dérier
Wo mesie le kloun
Wo ou gard amwin ti zangoun
Wo mesie le kloun
Té ou té vréman in moun

Wo Mersi wi Mersi Mersi Mesie Le Kloun

Commentaires

commentaires