Sakenn son vals

Sakenn son manyer
Rogard la vi dousman koulé
Pou 1 konm 1 rivyer
Pou lot konm 1 bato
Mé tout fason
Fo fé 1 rézon
‘Wa kwek i lé la vi
Kan li lé lwin laba
Si lorizon pou sak i get isi

Sakenn son fason
Rogard soley dor si la vi
1 boner lo tan té long
1 maler pou tro vitman fini
Mé tout manyer
1 bato in rivyer
‘Wa koman i lé la vi
Kan li lé lwin laba
Si lorizon pou sak i get isi

Sakenn son lorizon
Son filozofi “KER i vals ek rézon”
Mem zis pou zordi
Mové ou bon
Tanpi ou tanmye
I fé touzour
1 lorizon pou sak i get isi

I ret aster
Pou ‘war lot manyer
Pou sak lé si l’bato la vi
Kan li lé lwin laba
Si lorizon koman k’ou lé isi osi

Sakenn son lorizon…

Sakenn son manyer…
Sakenn son fason…
Sakenn son lorizon…
Sakenn son filozofi…
Sakenn son vi…
Sakenn son sakenn
Sakenn son vals

Commentaires

commentaires